Bananakökur eru góðar og það sama á við um klassískar marmarakökur. Þess vegna er þessi uppskrift alveg frábær.
Og svo er heldur ekki hægt að eiga of margar uppskriftir af bananakökum. Þær geymast vel þótt það sé svo sem ekki mikil þörf á því þar sem þær klárast yfirleitt svo fljótt.
Hún Svava á Ljúfmeti og lekkerheit deilir hér með okkur þessari ljúffengu uppskrift. En hún segist oftast baka tvær í einu því fyrri kakan klárist alltaf samdægurs.
Það sem þarf
- 3 stórir þroskaðir bananar
- 1/2 bolli (115 g) smjör, brætt
- 3/4 bolli (145 g) ljós púðursykur
- 1 stórt egg
- 1 tsk vanilludropar
- 1 tsk matarsódi
- 1/4 tsk salt
- 1 bolli (130 g) plús 1/4 bolli (35 g) hveiti
- 1/2 tsk kanill
- 1/4 bolli (20 g) kakó
- 3/4 bolli (130 g) súkkulaðidropar (eða hakkað súkkulaði)
Aðferð
Hitið ofn í 180° og smyrjið formkökuform.
Bræðið smjörið og stappið bananana saman við það.
Hrærið púðursykri, eggi, vanilludropum, matarsóda og salti saman við. Bætið 1 bolla (130 g) af hveiti saman við og hrærið snögglega saman við deigið.
Setjið helminginn af deiginu í aðra skál (þarf ekki að vera nákvæmt mál en helmingurinn af deiginu er um 365 g, veltur þó á stærðinni á bönununum).
Hrærið því sem eftir var af hveitinu ásamt kanilnum saman við annan helming deigsins. Hrærið kakó og súkkulaðibitum saman við hinn helming deigsins.
Setjið stórar doppur af deigi í botninn á forminu (það getur verið gott að miða við að setja einn lit í miðjuna á forminu og hinn sitt hvoru megin við).
Setjið næsta lag af deigi þannig að ljóst deig fari yfir dökkt deig og öfugt. Endurtakið þar til allt deigið er komið í formið. Notið smjörhníf eða spaða til að blanda deiginu örlítið saman (það getur verið gott að miða við að gera áttur með hnífnum á tveim til þrem stöðum – passið að gera ekki of mikið!).
Bakið kökuna í 55-65 mínútur eða þar til prjónn sem stungið er í kökuna kemur hreinn upp (það má þó gera ráð fyrir að það komi brætt súkkulaði á hann). Látið kökuna standa í forminu í smá stund áður en hún er tekin úr því.
Njótið!