Afar algengt er að konur yfir fertugt þjáist af höfuðverk sem rekja má til hormónasveifla.
Margar konur á frjósemisskeiði fá höfuðverk við byrjun eða lok blæðinga og/eða við egglos. Konur á breytingaskeiði geta hins vegar fengið höfuðverk hvenær sem er þar sem hormónasveiflurnar eru óútreiknanlegar.
Hormónar og aftur hormónar
Flest bendir til þess að orsök hormónatengdra höfuðverkja megi rekja til hormónsins estrógens. Mígreni þjakar ákveðinn hóp kvenna á breytingaskeiði en mígreni hefur verið tengt beint við estrógen. Er því ekki ólíklegt, ef konur þjást af mígreni, að það versni þegar líða tekur að lokum breytingaskeiðsins. Það er þó huggun harmi gegn að mígreni getur horfið eftir tíðahvörf þegar hormónadansinum er lokið. En mun færri konur yfir sextugt þjást af mígreni en yngri kynsystur þeirra.
Þetta er því allt hormónunum um að kenna.
Pirraðar og útkeyrðar
Sumar fæðu- og drykkjartegundir geta líka ýtt undir höfuðverk og mígreni, má þar nefna súkkulaði, ost, lauk og rauðvín. Þættir eins og streita, svefnleysi og sígarettureykur geta líka valdið höfuðverk. Þeir sem til þekkja vita að höfuðverkur er ekkert grín þar sem hann hreinlega rænir fólk allri orku. Skiljanlegt er að þær konur sem þjást af sífelldum höfuðverk séu þreyttar, pirraðar, útkeyrðar og áhugalausar.
En þótt það sé freistandi að skríða undir sæng og draga myrkratjöldin fyrir þá er betra að spyrna við fótum því lífið hefur upp á svo margt að bjóða og konur á þessum aldri eiga að njóta þess að vera til. Það er því vel þess virði að skoða hvort það sé eitthvað sérstakt sem ýtir undir höfuðverkinn.
Þú getur fært dagbók yfir allt sem þú borðar til að sjá hvort ákveðin fæðutegund kemur höfuðverknum af stað. Gættu þess líka að fá ferskt loft og reyndu að hreyfa þig.
