Umhirða hársins er mikilvægur þáttur í því að líta vel út. Hárið getur annað hvort látið konur líta út fyrir að vera eldri en þær eru eða yngri.
Allar konur hafa átt slæman hárdag svo þær vita alveg hvaða áhrif hárið getur haft á útlitið. Þá daga er ekki óalgengt að konum finnist þær líta út fyrir að vera eldri en þær eru.
Hárið og sjálfstraust
Þegar hárið er fallegt, glansandi, heilbrigt og vel klippt og snyrt getur það virkað sem vítamínsprauta fyrir sjálfstraustið. Það er staðreynd að við lítum svo miklu betur út þegar hárgreiðslan er í lagi.
Með aldrinum breytist hárið og þær vörur sem við erum vanar að nota þjóna jafnvel ekki sínum tilgangi lengur. Umhirða hársins kallar á nýjar áherslur og því er enn mikilvægara en áður að huga að því hvernig og hvaða vörur eru notaðar. Réttar hárvörur geta skipt sköpum og úrvalið hefur líklega aldrei verið meira en í dag.
Hægt er að fá vörur til að láta hárið virka þykkara, meira krullað, minna krullað, sléttara, meira glansandi og þar fram eftir götunum. Allar konur ættu því að geta fundið réttu efnin sem henta þeirra hári. Ef þú ert í vandræðum með að velja réttu vörurnar fáðu þá hárgreiðslumeistarann þinn til að hjálpa þér við það.
Hárið og fæðan
En það eru þó ekki eingöngu réttu hárvörurnar sem skipta máli því hvað þú lætur ofan í þig hefur ekki síður áhrif á hárið. Ytri fegurð byrjar nefnilega alltaf innan frá. Ef þú borðar endalaust ruslfæði þá hefur það áhrif á hárið, húðina og heilsuna. Hárið bregst á sama hátt og húðin og líkaminn við því sem þú borðar. Til að hárið sé fallegt og ræktarlegt þarfnast það ákveðinna næringarefna. Hárlos getur til dæmis stafað af járnskorti og B-vítamín skorti.
Það þýðir því lítið að kvarta yfir því að hárið sé ómögulegt ef þú gefur því ekki réttu fæðuna til þess að það geti verið í góðu ástandi.
Hér eru nokkur atriði sem eru mikilvæg fyrir hárið
Vatn – að drekka nóg af vatni til að hjálpa meltingunni, léleg melting leiðir af sér að hárið verður feitt og líflaust.
Að taka inn Omega-3 fitusýrur og lýsi.
Grænt te – fullt af andoxunarefnum og getur hjálpað til við þykkt og
glans.
Að borða nóg af fersku grænmeti.
Að borða nóg af ávöxtum.
Að borða heilkornavörur.
Að borða möndlur, döðlur og fíkjur.
Að borða feitan fisk eins og lax, túnfisk, síld og sardínur.
Rautt kjöt er líka gott við járnskorti.
Hárið breytist með hærri aldri
Með aldrinum er algengt að hárið verði fíngerðara og þynnra. Reyndar getur það líka þykknað á ákveðnum stöðum og orðið ansi óviðráðanlegt. Hið fyrra er þó algengara. Hárlos er einnig vandamál hjá mörgum konum. Þá getur hárið orðið krullað eða liðað, þunnt að ofan, úfið, hangandi og líflaust.
En það eina sem engin kona sleppur við eru gráu hárin. Afar misjafnt er hvernig konur bregðast við þessum gráu hárum. Á meðan sumar konur fagna gráa litnum og eru ánægðar með þessar nýju strípur fórna aðrar höndum og panta sér strax tíma í litun. Hver og ein kona verður að meta það hvernig hún tekur á móti þessum nýja lit.
Því verður ekki neitað að grátt hár lætur flestar konur líta út fyrir að vera eldri en mörgum finnst það líka í fínu lagi. Svo er líka spurning hvort grátt hár klæði allar konur. Sumar konur eru það heppnar og vel útlítandi að þær bera hvaða hárlit sem er. En meirihluti kvenna tilheyrir engu að síður þeim flokki að einhver einn litur klæðir þær betur en annar.
Góð umhirða enn og aftur
Grátt hár þarfnast ekki síður góðrar umhirðu. Erfiðara getur verið að eiga við gráa hárið þar sem það er yfirleitt grófara, stífara og þurrara. Fyrstu gráu hárin sem birtast eru líka gjarnan beygluð eða krulluð og allt öðruvísi en önnur hár en það lagast hins vegar þegar þeim fjölgar á höfðinu. Það er því um að gera að nota góðar hárvörur og hárnæring er gráa hárinu nauðsynleg.
