Það er alls ekkert sjálfgefið og reyndar langt frá því að allir eigi gleðileg jól.
Þegar maður er mikið jólabarn þá gerir maður stundum ráð fyrir því að öllum öðrum finnist þetta einn besti tími ársins.
En þannig er það alls. Því hjá mörgum er þetta nefnilega einn erfiðasti tími ársins.
Margir eiga um sárt að binda
Margt spilar inn í að fólk geti ekki átt gleðileg jól. Fjárhagsáhyggjur og veikindi gera þennan tíma t.d. afar erfiðan hjá mörgum.
Þá líður þeim sem kljást við þunglyndi oft illa á þessum árstíma og svo eru það allir þeir sem hafa misst ástvini á árinu og halda nú jól án þeirra. Þetta fólk á um sárt að binda. Við hin sem eigum þess kost að halda gleðileg jól þurfum að passa upp á allt þetta fólk og sýna samhug í verki.
Jólin eru hátíð kærleikans og það er einmitt á þessum árstíma sem það besta brýst fram í fólki. Ótrúlegustu einstaklingar verða meyrir og sýna kærleikann í verki – sem er auðvitað alveg hreint frábært. En þótt við segjum að enginn eigi að vera einn um jólin þá má ekki heldur troða félagsskap upp á þá sem það alls ekki vilja. Sumum líður bara þannig að þeir vilja fá að vera einir og það þarf í sjálfu sér ekki að vera það versta.
Reyndu að hafa jólin og aðdraganda þeirra eins og hentar þér og þínum
Allir verða að fá að halda jólin eins og þeim hentar. Það er engin rétt uppskrift til að fullkomnum jólum því sitt sýnist hverjum um það. Og svo koma jólin líka oft á óvart og í minningunni eru það einmitt gjarnan jólin þar sem eitthvað fór úrskeiðis sem við munum best eftir og hugsum til með hlýhug.
Ekki gera eitthvað um og fyrir jólin af því þér finnst að þú eigir að gera það – því það er ekki til þess fallið að láta þér líða vel. Þótt hún Gunna vinkona þín baki 5 sortir af smákökum, Anna frænka sendi 50 jólakort og Palli frændi höggvi sitt eigið jólatré þá þarft þú ekki að gera neitt af þessu. Allt snýst þetta fyrst og fremst um kærleikann og að þér líði vel með það sem þú gerir.
Jólin eru ekki kapphlaup og það er ekki gott að nenna ekki jólunum af því þér finnst kröfurnar of miklar. Höldum okkar eigin jól … en ekki jól eins og aðrir vilja. Því eitt er alveg öruggt og það er að jólin koma hvort sem við erum búin að þrífa allt hátt og lágt, gera konfekt og sultu eða skreyta matarborðið óaðfinnanlega.
Njótum þess að vera með þeim sem okkur þykir vænt um og gætum að öllum þeim sem eiga erfitt á þessum tíma.
Megi þið öll finna gleði og frið á jólum.
Jóna Péturs – kokteillinn@gmail.com
