Þegar við eldumst er augljóst mál að húð okkar breytist og því þarf að endurskoða umhirðu húðarinnar sem og förðun hennar.
Það sem einu sinni virkaði svo vel og var voða flott gerir allt í einu ekkert fyrir okkur og lætur okkur bara líta út fyrir að vera eldri en við erum. Og þá er nú betra að sleppa því!
Hér eru förðunarmistök sem geta látið okkur líta út fyrir að vera 10 árum eldri
1. Að nota of mikið meik
Mikilvægt er að velja létt og gott meik sem hentar þinni húðgerð því of þykkt meik sest í fínu línurnar og gerir þær meira áberandi.
Auk þess dregur það úr ljóma húðarinnar því það hylur hana alveg. Forðastu meik sem hefur lýsinguna „matte“, „velvet“ eða „long-wearing“ og veldu frekar eitthvað í léttari kantinum. Mjög gott er að fá að prófa meikið áður en keypt er, ef það er möguleiki.
2. Að hylja svæðið undir augunum
Sé notaður of þykkur fljótandi hyljari eða stifti til að hylja bauga undir augum getur það ýtt undir fínu línurnar á því svæði. Þarna er húðin afar þunn og því myndast línur fljótt. Notaðu frekar fínan penna eða léttan fljótandi hyljara – og eitthvað sem lýsir svæðið aðeins upp.
3. Að nota of mikið púður
Sé of mikið púður notað gerir það lítið annað en að draga fram allar fínar línur og hrukkur. Ef þú ert vön að nota fast púður og hefur gert það í mörg ár gæti þér fundist erfitt að sleppa því.
Veldu þér létt og laust púður og það þarf ekki að setja púðrið á allt andlitið. Byrjaðu á því að setja á nefið, hökuna og ennið – eða þar sem of mikill glans myndast.
4. Að nota of dökkan varalit
Dökkir rauðir og vínrauðir varalitir eru mjög fallegir en þegar við eldumst gera þeir ekkert rosalega mikið fyrir okkur. Dökkur varalitur gerir fínar línur kringum munninn meira áberandi en auk þess gerir hann varirnar minni en þær eru. Það væri kannski fínt fyrir eitthvað annað svæði líkamans en stórar og vel mótaðar varir gera hins vegar svo mikið fyrir okkur.
Veldu frekar bjartari liti og með glans en ekki alveg matta.
5. Að nota of mikinn varalitablýant
Varalitablýantur er mjög góður til þess að undirstrika línur varanna og til að koma í veg fyrir að varaliturinn renni út í fínar línur kringum munninn. En það er hins vegar ekki fallegt að nota of mikið af honum eða of dökkan lit og í raun er betra að sleppa því en nota of mikið.
Mjög gott er að nota lit sem er eins og varirnar á litinn en ekki eins og varaliturinn.
6. Að nota svartan augnblýant
Það getur verið gott að skipta svarta augnblýantinum út fyrir mýkri brúnan tón því kolsvört þykk lína getur virkað of hörð og dregið augun niður í stað þess að opna þau. Prófaðu því að nota brúnan blýant og dragðu línuna meðfram efri augnhárum og litaðu vel ofan í rótina á hárunum. Þetta ætti að opna augun.
Ef þú vilt nota svartan, gættu þess þá að nota góðan blýant/lit og og ekki hafa línuna of þykka.
7. Að nota bæði maskara og augnblýant á neðri augnhárin
Leyfðu efri augnhárunum að njóta sín og gerðu minna úr þeim neðri. Ef þú setur bæði maskara og dregur línu á þau neðri getur það gert augun meira hangandi í stað þess að virka opin.
8. Að nota of dökkan augabrúnalit
Undanfarið hefur mikil áhersla verið lögð á augabrúnir og þykja fallega mótaðar augabrýr mikil prýði. Þegar við eldumst lýsast þessi hár og því gengur ekki að nota sama blýantinn og þú hefur notað í mörg, mörg ár.
Fáðu þér nýjan blýant og veldu lit sem er einum til tveimur tónum ljósari en augabrúnahárin.
9. Að sleppa kinnalit
Ekki sleppa því að nota kinnalit því hann lífgar svo mikið upp á andlitið og gefur frísklegra og unglegra útlit. Gættu þess að nota lit sem hentar þínum húðlit og gott er að fá ráðleggingar hjá sérfræðingi hvernig best er að nota hann – því það fer svolítið eftir andlitsfalli. Og sé hann rétt settur á getur hann gert gæfumuninn í frísklegra útliti.
