Ég verð að viðurkenna að blómkál hefur hingað til ekki verið á óskalista hjá mér yfir gott meðlæti. Venjulegt soðið blómkál er í mínum huga ekki spennandi réttur enda ekki nógu bragðmikið.
Er komið á listann
En með þessu ofnbakaða og vel kryddaða blómkáli er þessi réttur klárlega orðinn einn af mínum uppáhalds. Ég bar hann fram með bleikju og hann smellpassaði með fiskinum. Og ég get ímyndað mér að hann passi alveg jafn vel með kjúklingi og öðru kjöti.
Blómkál er auðvitað stútfullt af góðum næringarefnum og vitamínum eins og C-vítamíni, K- og B6 vítamínum.
Hér er uppskrift fyrir þá sem vilja hafa blómkálið sitt aðeins bragðmeira
Það sem þarf
1 blómkálshöfuð
3 hvítlauksrif
1 laukur
1 dós niðurskornir tómatar
1 msk jómfrúarolía
1 tsk cumin (broddkúmen)
½ tsk túrmerik
1 tsk sjávarsalt
½ tsk svartur pipar
má skreyta og bragðbæta með steinseljulaufum og rauðum piparflögum ef vill.
Aðferð
Hitið ofninn að 200 gráðum.
Takið blómkálið og brytjið niður, ekki of smátt
Hitið ólíufolíu á stórri pönnu.
Steikið lauk og hvítlauk í olíunni í um 3 mínútur.
Setjið blómkálið á pönnuna og veltið því upp úr lauknum.
Bætið þá tómötum saman við kálið og kryddið með cumin, túrmeriki, salti og pipar.
Blandið þessu öllu vel saman og þekjið kálið vel.
Setjið pönnuna inn í ofn eða færið allt í eldfast mót.
Bakið í ofni í 45 mínútur og berið strax fram.
Njótið!
Jóna Péturs – kokteillinn@gmail.com
