Loft og uppþemba angrar marga og þótt slíkt sé sjaldnast merki um eitthvað alvarlegt þá er þetta engu að síður mjög óþægilegt.
Mörgum líður eins og þeir séu með körfubolta í maganum og þrýstingurinn getur verið ansi mikill. Þess utan þá er eins og öll föt verði einu til tveimur númerum of lítil á meðan þetta gengur yfir – og yfirleitt gengur þetta nú yfir á nokkrum tímum.
En hvað er hægt að gera og hvað ætti að forðast til að koma í veg fyrir uppþembu?
1. Hraðinn hefur áhrif
Þótt hraði sé ekki beint orsakavaldur uppþembu þá getur hann samt haft mikil áhrif. Hraði einkennir líf margra í dag og allt þarf að gerast frekar hratt. Þess vegna gefur fólk sér oft ekki tíma til að borða í rólegheitum.
Allt of margir troða einhverju í sig á hlaupum og með því gleypa þeir mikið af lofti. Loftið leiðir síðan til uppþembu. Þegar borðað er of hratt verða bitarnir oftast stærri og fólk tyggur ekki matinn jafn vel sem gerir meltinguna erfiðari. Þá fylgist fólk heldur ekki nógu vel með því hversu mikið það lætur ofan í sig þegar borðað er of hratt.
2. Að drekka gegnum rör
Í dag eru margir drykkir drukknir í gegnum rör, eins og t.d. „smoothie“, heilsudrykkir og alls kyns kaffidrykkir. En eins hentugt og þetta getur verið þá veldur það um leið uppþembu.
Það skiptir víst engu máli hversu hratt eða hægt er drukkið – ekki er hægt að koma í veg fyrir að það myndist loft.
3. Kál og uppþemba
Grænkál, rósakál og brokkolí veldur allt lofti og uppþembu. Efni í grænkálinu valda sérstaklega mikilli uppþembu en sé það soðið eða steikt minnka loftáhrifin.
Ef þú borðar mikið af þessu grænmeti og þembist upp þá gæti lausnin verið sú að elda kálið annað slagið í stað þess að borða það alltaf ferskt. Kálið veldur einnig uppbembu sé þess neytt í formi heilsudrykkja.
4. Borðar þú of mikið af baunum?
Baunir, af flestum gerðum, eru enn einn orsakavaldur lofts og uppþembu. Þannig að þeir sem þjást að of mikilli uppþembu ættu að skoða hvort þeir neyti of mikilla bauna.
5. Of mikið natríum
Pakkamatur eins og saltkex, flögur, morgunkorn, súpur, salatsósur og jafnvel tómatsósa geta öll valdið uppþembu. Ástæðan er sú að þessar vörur innihalda mikið af natríum.
6. Engar hitaeiningar og gerviefnin
Sætuefni og gervisykur er í mörgum vörum í dag, allt frá gosdrykkjum til mjólkurafurða. Þrátt fyrir að kostur sætuefna sé sá að þau innihaldi fáar eða engar hitaeiningar þá hafa þau þann ókost í för með sér að þau valda mikilli uppþembu. Og líkaminn á víst mjög erfitt með að vinna úr þessum gerviefnum.
7. Loftbólur
Gosdrykkir og sódavatn eru full af loftbólum sem gera drykkina meira spennandi. En loftbólurnar valda hins vegar uppþembu og er sykurlaust gos víst enn verra út af sætuefnunum.
8. Að tyggja stöðugt og sjúga
Að nota tyggjó og borða hart sælgæti eins og brjóstsykur og hlaup getur valdið uppþembu. Hér á það sama við og þegar drukkið er í gegnum rör og borðað of hratt, þ.e. að það myndast loft.
9. Borða of seint
Ef heil máltíð er borðuð stuttu áður en farið er að sofa getur það valdið uppþembu morguninn eftir.
Þannig að ef loft og uppþemba er eitthvað sem angrar þig ættirðu að gæta þess að borða kvöldmáltíðina þremur til fjórum tímum áður en þú ferð í rúmið.