Þannig er best að eiga við stressið samkvæmt stjörnumerkinu þínu

Stressið getur tekið sinn toll af okkur og því er afar gott að þekkja sín mörk og vita hver besta leiðin er til að ná sér niður og slaka á.

Og í þessu geta stjörnumerkin einmitt hjálpað okkur.

Hér eru góð ráð varðandi það hvernig best er fyrir þig að höndla stressið, byggt á því í hvaða stjörnumerki þú ert.

Sjáðu hvað sagt er um þitt merki

Hrúturinn

Orka hrútsins getur verið mikil og sterk. En þegar streitan tekur völdin getur hins vegar allt farið á aðra hliðina hjá hrútnum. Þá er besta leiðin fyrir fólk í hrútsmerkinu að ná líkamshitanum upp og svitna svolítið.

Að ná góðri líkamlegri hreyfingu getur haldið hrútnum vel stilltum andlega sem og orkumiklum.

Nautið

Þegar nautið er stressað á það til að detta í óhollustuna. Það er mikilvægt fyrir nautið að hlusta á líkama sinn og þekkja mörkin hvenær hann er mettur og hvenær hann er svangur. Með því að velja skynsamlega það sem það lætur ofan í sig nær nautið betri tökum á stressinu því viðkvæmur líkami þess þolir illa ofát og óhollustu.

Tvíburinn

Fólk í þessu merki elskar að læra og tala enda er hugsun og samskipti ríkjandi þáttur þessa merkis. Tvíburanum líður alltaf betur ef hann fær svör við spurningum sínum og hefur staðreyndirnar á hreinu. Það auðveldar honum líka að ræða aðstæður sínar við góðan vin – en slíkt er ákaflega streitulosandi fyrir tvíburann. En það sem tvíburinn þarf líka að gæta sín á er að innbyrða ekki of mikið af upplýsingum, t.d. eins og að liggja endalaust á netinu í leit að upplýsingum. Því það eykur á streitu tvíburans.

Krabbinn

Krabbinn elskar að vera heima hjá sér og að eiga sitt eigið athvarf er honum mikilvægt. Að vera heima með fólkinu sínu og þeim hlutum sem skipta hann máli er ákaflega streitulosandi fyrir krabbann. Og þótt krabbinn sé oft upptekinn af hinu og þessu þegar hann er heima þá skiptir það miklu máli fyrir hann að fá tíma í ró og næði fyrir sjálfan sig. En þetta er nokkuð sem veitir krabbanum frið og ró.

Ljónið

Ljónið þarf að vera sískapandi og því kemur ekki á óvart að helsta slökun þeirra felist í því að koma með eitthvað nýtt inn í þennan heim. Hvort sem það er að mála, syngja eða elda þá líður ljóninu strax betur þegar það skapar eitthvað í stað þess að sitja og láta stressið fara með sig. Ljónið þarf því að láta ljós sitt skína vilji það vera laust við streitu.

Meyjan

Hún er harðákveðin í því að gera heiminn að betri stað. Það getur því verið ákaflega streituvaldandi fyrir hana þegar það stóra verkefni verður of yfirþyrmandi. Þess vegna er gott fyrir einstaklinga í meyjunni að gera eitthvað smærra þegar stressið tekur völdin. Minni verkefni eins og að þrífa, taka til og skipuleggja heimilið er alveg tilvalið fyrir meyjuna til að ná sé niður – sérstaklega þar sem hún sér afraksturinn strax.

Vogin

Vogin er sögð merki samstarfsins. Þetta eru vitsmunalegar verur sem nota höfuðið við krefjandi aðstæður. En það er voginni afar mikilvægt að tala um hlutina og því er henni nauðsynlegt að eiga góðan vin sem hún getur talað við þegar erfiðleikar bjáta á. Að ræða málin hjálpar þessum einstaklingum að hugsa hlutina út í ystu æsar og það eitt og sér getur lækkað streitustuðul vogarinnar.

Sporðdrekinn

Spordrekinn er allt í senn, tilfinningavera, kynvera og andleg vera. Fyrir sporðdrekann er kynlíf einn besti streitulosandi þátturinn. En ef kynlíf er ekki í boði þegar á bjátar á sporðdrekinn afar auðvelt með að sleppa kynverunni og fara í þá andlegu. Það gerir hann með því að láta sig dreyma og gefa ímyndunaraflinu lausan tauminn.

Bogmaður

Bogmaðurinn þráir að vita um hvað lífið raunverulega snýst og hver tilgangur okkar hér á jörðinni er. Bara það að finna sinn eigin tilgang í lífinu getur hjálpað bogmanninum að viðhalda jákvæðu sjónarhorni. Fólk í þessu merki þarf að hafa markmið sín skýr til að þrífast. Þegar bogmaðurinn fer á taugum ætti hann að sækja innblástur til góðs kennara/mentors, lesa tilvitnanir fullar af innblæstri eða jafnvel halda sína eigin dagbók.

Steingeitin

Fólk í þessu merki elskar að skipuleggja. Geitin er alltaf að klifra upp á við og vill á sama tíma sjá leiðina upp. En ef leiðin verður þokukennd og hún er ekki viss um hvernig hún nái markmiðum sínum fer stressið að segja til sín. Þess vegna þarf steingeitin á öllu þessu skipulagi sínu að halda og gott er fyrir að hana að hafa nokkur leikplön í gangi. Til að draga úr stressi getur hjálpað að gera dagleg, vikuleg og mánaðarplön – sem og plön til fimm eða tíu ára.

Vatnsberinn

Vatnsberinn er merki vona, drauma og væntinga – og þetta eru einstaklingar sem sjá allt fyrir sér. Þeir hafa enga þolinmæði fyrir gráköldum hversdagsleikanum. Þegar vatnsberinn er stressaður getur hann notað þennan hæfileika sinn að sjá hlutina fyrir sér. Með því að fara í þann leik og einbeita sér að því að sjá hlutina fyrir sér eins hann vill hafa þá getur vatnsberinn dregið úr stressi og endurheimt bjartsýnina. Það gæti hjálpað að gera svo kallað draumakort og hengja upp á vegg.

Fiskurinn

Fiskurinn heillast af öllu andlegu og dulrænu. Þetta er síðasta merkið í stjörnuhringnum og í fiskinum safnast saman reynsla allra hinna merkjanna. Fiskurinn upplifir allar þær tilfinningar sem mannskepnan býr yfir. Einstaklingar í þessu merki eru samúðarfullir og næmir og þarfnast þess að gera eitthvað með þessar tilfinningar. Það besta sem fiskurinn getur gert fyrir sjálfan sig til að róa sig og ná sér niður, þegar stressið tekur yfirhöndina, er að hugleiða.

Heimildir – wellandgood