Við Íslendingar búum við myrkur og kulda stóran hluta ársins og því ekki skrýtið að þjóðin taki sólinni fagnandi þegar hún loksins lætur sjá sig.
En sólardýrkendur þurfa þó að hafa í huga að of mikil sól er ekki góð fyrir húðina. Þótt hún sé okkur nauðsynleg þá getur of mikið af henni haft slæm áhrif á húðina.
Kuldinn, sólin og reykingar
Þeir sem helst vilja liggja heilu dagana í sólbaði ættu að endurskoða það því sólin þurrkar húðina og hraðar fyrir öldrun hennar svo djúpar hrukkur og elliblettir myndast.
En kuldinn getur líka farið illa með húðina og er því mikilvægt að næra hana og vernda vel yfir veturinn. Það sama má segja um reykingar sem flýta óþarflega fyrir öldrun húðarinnar.
Getum ekki endurheimt æskuljómann
Við getum víst ekki snúið klukkunni við og endurheimt æskuljómann. En það sem við hins vegar getum gert er að reyna að sporna við of hraðri öldrun húðarinnar. Ýmislegt má nefnilega gera, og einnig forðast, til að snúa dæminu við og hægja á ferlinu.
Hér eru átta atriði til viðbótar sem vert er að hafa í huga – en öll geta þau flýtt fyrir öldrun húðarinnar:
1. Að vera of grannur
Já það getur verið ókostur að vera of grannur. Minni fita í andlitinu leiðir til þess að húðin verður þurrari og sígur frekar. Síendurteknir megrunarkúrar hafa líka sínar afleiðingar.
Að fitna og grennast til skiptis teygir á húðinni og gerir hana slappari og lausari.
2. Að sofa ekki nóg
Öll vitum við að svefninn er okkur nauðsynlegur fyrir orku og einbeitingu. En hann er húðinni alveg jafn mikilvægur. Á nóttunni fer mikið uppbyggingar- og endurnýjunarstarf fram í húðinni. Svefninn er því dýrmætur fyrir útlit og litaraft húðarinnar.
Auk þess fáum við bæði dökka bauga og poka undir augun af svefnleysi og slíkt gerir allt annað en að yngja okkur.
3. Að sofa á hliðinni
Þótt mörgum finnist gott að liggja í fósturstellingunni þá er það víst ekki það besta fyrir húðina í andlitinu. Sama má segja um að sofa á maganum. Til langs tíma eru slíkar svefnvenjur ekki góðar fyrir húðina þar sem andlitið þrýstist nótt eftir nótt ofan í koddann. Þetta veldur því að húðin klessist og krumpast svo hrukkur myndast.
4. Að drekka gegnum rör
Þótt það sé þægilegt og margir geri það tannanna vegna, eða til að forðast að flöskur og dósir snerti varirnar, þá veldur þetta auknum fínum línum kringum munninn. Hér er um að ræða sömu hreyfinguna og þegar sígarettur eru sognar, en hrukkur kringum munninn eru einmitt áberandi hjá reykingafólki.
5. Að nudda mikið augun
Að toga, teygja og nudda viðkvæma húðina kringum augun getur leitt til þess að svæðið kringum augun dökknar. Slíkt getur bætt nokkrum árum á okkur.
6. Að gleyma sólgleraugunum
Mikilvægt er að nota sólgleraugu í sólinni svo þú sért ekki stanslaust að píra augun og þannig að auka á hrukkumyndun. Auk þess brýtur sólin niður kollagen í þunnri húðinni kringum augun. En eins og áður sagði er það svæði viðkvæmt.
7. Að nota sápu
Ekki nota sápu á andlitið þar sem hún inniheldur sterk efni sem svipta húðina sinni náttúrulegu fitu og olíu. Þurr húð lítur út fyrir að vera hrukkóttari en rök og vel nærð húð.
8. Að vera yfir sig stressaður
Ef þú ert stöðugt með áhyggjur og krónísk streita einkennir líf þitt eru miklar líkur á ótímabærri öldrun. Aðalstreituhormónið, kortisól, brýtur niður kollagen í húðinni. Það leiðir til þess að húðin sígur, hrukkur myndast og húðin þrútnar og bólgnar.