Sturtuvenjur okkar flestra eru eitthvað sem við gerum nokkuð sjálfvirkt og án þess að hugsa það eitthvað sérstaklega. Við skrúfum frá sturtunni og síðan er restin sett á sjálfstýringu.
En það er vel hugsanlegt að þú sért hvorki að gera húð þinni né hári neitt gott með sturtuferðunum. Því þótt þú sért að þvo í burtu svita og skít þá geta venjur þínar um leið haft neikvæð áhrif á húð og hár.
Hér eru 6 algeng mistök sem við gerum varðandi sturtuferðirnar
1. Að nota of heitt vatn
Við getum líklega flest verið sammála því að það er fátt notalegra en vel heit sturta. En þótt notalegt sé að fá heitt vatnið á skrokkinn þá er það víst ekki gott fyrir húð og hár.
Heitt vatnið sviptir hárið sinni náttúrulegu olíu sem gerir það að verkum að hárið verður þurrt og gjarnt á að slitna.
Þetta á einnig við um húðina. En heitt vatnið þurrkar húðina og þá myndast gjarnan kláði.
Ef þú vilt komast hjá þessu hafðu þá vatnið volgt. Og já við vitum að það er ekki næstum eins notalegt.
2. Að vera of lengi í sturtunni
Hver kannast ekki við þetta?
Það getur verið erfitt að skrúfa fyrir heitt vatnið og fara út í kalt loftið. En langar heitar sturtuferðir eru ekki góðar fyrir húðina og hárið – og er það af sömu ástæðu og hér á undan.
Ylvolg og stutt sturta er málið og er ágætt að miða við svona 5 mínútur.
3. Að nota of mikið af efnum/vörum
Þú þarft ekki að fylla lófann af sjampói til að þvo hárið. Og ef þú gerir það ertu að nota allt of mikið af því. Magnið sem ætti að miða við er eins og stór dropi en fer auðvitað eftir sídd og þykkt hárs. Fyrir sítt, þykkt hár er til dæmis ágætt að miða við stærðina á tíkalli og fyrir stutt hár má miða við stærðina á fimmkalli.
Takmarkaðu líka sápuna á líkamann og gott er hafa í huga að minna er meira. Því ef þú notar of mikið þessum vörum ertu að gera húðina og hárið þurrara en gott er.
4. Að þvo hárið allt of oft
Skoðaðu það hvort nauðsynlegt sé að þvo hárið í hverri einustu sturtuferð. Ef hárið er þvegið of oft eru allar líkur á því að það verði þurrt og óviðráðanlegt. Svo ekki sé nú talað um ef þú notar hárblásara til að þurrka hárið eftir sturtuna. En hitinn af blásaranum fer ekki vel með hárið.
Í dag má fá virkilega góð þurrsjampó til að nota á milli þvotta svo það ætti ekki að vera vandamál að hafa hárið samt fínt og huggulegt án þess að það sé þvegið daglega.
5. Að nota venjulegt sápustykki
Notkun venjulegra sápustykkja geta þurrkað húðina mikið.
Ástæðan er sú að slíkar sápur hafa oftast hátt pH-gildi sem er of mikið fyrir húðina. Auk þess geta sápustykkin borið með sér sýkla, sérstaklega þegar fleiri en einn nota sama stykkið.
6. Að næra húðina ekki strax á eftir
Ekki geyma það að bera nærandi krem á húðina um leið og þú kemur úr sturtunni. Þurrkaðu húðina mjúklega með handklæði og alls ekki nudda hana of fast með handklæðinu.
Berðu síðan gott krem á allan líkamann strax að því loknu en ekki fara að gera eitthvað annað áður og bera síðan á þig. Þetta skiptir máli upp á að loka rakann og næringuna inni.
