Ég er virkilega veik fyrir Pavlovum, og reyndar bara marengskökum yfir höfuð. Mér finnst svo gott þegar stökkur marengsinn bráðnar í munninum.
Einmitt þess vegna freistast ég oft til að prófa nýjar uppskriftir að þessari dásemd þegar ég rekst á þær.
Hér er ein sem ég hef gert en hún er ólík öðrum sem ég hef prófað – líklega er það hnetusmjörið og saltkaramellan sem eiga þar hlut að máli.
Og ég er ekki frá því að þessi dásemd sá bara betri daginn efti… alla vega ekki verri!
Það sem þarf
Pavlova
4 stórar eggjahvítur
1 tsk hvítvínsedik
250 gr sykur
½ msk maísmjöl
2 msk kakóduft
Kremið/rjóminn
50 ml rjómi
70 gr hnetusmjör
200 ml rjómi
Ofan á kökuna
Snickers (ca 1 og 1/2)
salthnetur
karamellusósa með sjávarsalti
bráðið dökkt súkkulaði
Aðferð
Byrjið á því að teikna hring á bökunarpappír fyrir kökuna. Gott er að nota hringlaga kökumót til að teikna eftir.
Hitið ofninn að 180 gráðum.
Setjið þá eggjahvítur og edik í skál og hrærið mjög rólega saman þar til stórar kúlur fara að myndast. Þegar kúlurnar fara að verða minni hækkið þá hraðann og hrærið í 3 til 4 mínútur.
Á meðan eggjablandan er hrærð blandið þá sykri, maísmjöli og kakó saman í skál og hrærið létt saman.
Bætið sykurblöndunni út í eggjablönduna með því að setja eina matskeið í einu út í á meðan hrært er.
Þegar allur sykurinn er kominn út í haldið þá áfram að hræra í svona 4 til 5 mínútur – eða þar til sykurinn hefur blandast vel.
Dreifið úr blöndunni á bökunarpappírinn með því að byrja á að gera hringinn yst og skilja miðjuna eftir auða.
Fyllið síðan í miðjuna en reynið að láta þetta vera eins og skál þar sem miðjan er dýpri.
Setjið inn í heitan ofninn en lækkið hitann niður í 150 gráður. Bakið í 1 tíma og 45 mínútur.
Að þessum tíma liðnum slökkvið þá á ofninum og látið kökuna kólna þar inni í góðan tíma. Allt upp í 2 til 4 tíma. Ég opna reyndar alltaf hurðina og hef hana opna á meðan kakan kólnar.
Saxið salthnetur og Snickers og bræðið dökkt súkkulaði yfir vatnsbaði til að setja yfir kökuna að lokum.
Hrærið hnetusmjör og 50 ml af rjóma vel saman í lítilli skál.
Þeytið 200 ml af rjóma (ég notaði reyndar meira en 200 ml og fannst ekki veita af því, mæli með 250 ml). Ekki hafa rjómann of mikið þeyttan.
Bætið hnetusmjörsblöndunni varlega saman við rjómann og hrærið með sleif.
Setjið þá rjómablönduna á miðja Pavlovuna og dreifið úr henni. Farið samt ekki alveg út í endana.
Dreifið karamellusósu eftir smekk yfir kökuna (ég notaði tilbúna saltkaramellusósu sem ég keypti).
Dreifið síðan salthnetum og niðurskornu Snickers yfir kökuna.
Og að lokum er bráðnu súkkulaði dreift yfir.
Og voilà! Þá er þessi dásemd tilbúin til að njóta.
Sjáðu hér í myndbandinu hvernig þetta er gert
Jóna Péturs – kokteillinn@gmail.com
