Þrátt fyrir að flestar konur fari í gegnum breytingaskeiðið án teljandi erfiðleika eru ekki allar jafn heppnar. Því þetta tímabil getur reynst sumum konum afar erfitt.
Skap kvenna er misviðkvæmt fyrir öllu því hormónahoppi sem á sér stað og upplifa sumar konur þunglyndi í fyrsta skipti á ævinni þegar þær fara í gegnum breytingaskeiðið.
Bæði móðirin og unglingurinn með hormónana úti um allt
Það mæðir oft mikið á konum á þessum aldri og því ekkert óeðlilegt að eitthvað gefi eftir. Fyrst og fremst geta það verið hitakóf og nætursviti sem gerir þær örmagna.
Þess utan eru margar konur með börn á unglingsaldri á heimilinu sem getur aukið spennuna á heimilinu þar sem bæði móðirin og unglingurinn eru með hormónana úti um allt. Þá eru þær að hugsa um aldraða foreldra sína, jafnvel tengdaforeldra og að rembast við að sinna starfi sínu og frama.
Engar tvær konur eru eins
Meiri hætta er á að konur sem þurft hafa að stríða við miklar og erfiðar skapsveiflur fyrir blæðingar og/eða eftir barnsburð finni fyrir tilfinningalegu ójafnvægi á breytingaskeiðinu.
Ef þú hefur áður fundið fyrir miklum skapsveiflum og depurð og finnst þú vera óeðlilega pirruð núna, eiga erfitt með svefn og þess að njóta skemmtilegra hluta, ert vonlaus og finnst erfitt að taka ákvarðanir, þá skaltu ræða við lækninn þinn. Þunglyndi er ekkert til að skammast sín fyrir og mundu að líkami okkar er misviðkvæmur fyrir því hormónahringli sem einkennir þetta tímabil. Þótt vinkona þín sé hoppandi kát og kröftug á breytingaskeiðinu er ekkert sjálfgefið að þú sért það líka – því engar tvær konur eru eins
Einkenni þunglyndis geta m.a. verið eftirfarandi
Minni matarlyst og þyngdartap en getur líka verið aukin matarlyst og þyngdaraukning
Breyting á útliti og hegðun
Minna þrek – sífellt uppgefin og þreytt
Svefntruflanir – eiga erfitt með svefn en getur líka verið aukin svefnþörf
Ekki lengur áhugi á ýmsu sem áður þótti skemmtilegt
Vanmáttarkennd og vonleysi
Sektarkennd og sjálfsásakanir
Depurð
Svartsýni
Framtaksleysi
Pirringur, kvíði og grátköst
Gleymska og einbeitingarskortur
Tregða í tali og hreyfingum
Minni kynhvöt
Leitaðu aðstoðar fyrr en seinna
Vissulega eru sum þessi einkenni þau sömu og konur á breytingaskeiði geta fundið fyrir. En tilfinningar eins og depurð, leiði og svartsýni eru eðlilegar tilfinningar sem tengjast oft ákveðnum atburðum og þáttum í lífinu og eru því skiljanlegar í samræmi við aðstæður hverju sinni.
Hjá þunglyndum einstaklingum eru þessar neikvæðu tilfinningar mun sterkari og vara lengur. Þær hreinlega taka völdin í lífinu. Ef þú hefur fundið fyrir fjórum eða fleiri af ofangreindum einkennum í meira en tvær vikur skaltu leita þér aðstoðar fyrr en seinna.