Snúðar eru alltaf jafn vinsælir enda fátt betra en mjúkur snúður með súkkulaði og ískaldri mjólk.
Þessir snúðar eru alveg afbragð og betri en snúðar sem fást í bakaríinu – svo ekki sé minnst á hversu miklu hagkvæmara það er að gera sína eigin snúða.
Uppskriftin er alls ekki flókin og í raun alveg lygilega einfalt að gera þá.
Prófaðu þessa um helgina!
Það er hún Valla frá Eldhúsinu hennar Völlu sem á heiðurinn af þessum æðislegu snúðum.
Það sem þarf
700 gr brauðhveiti
1 ½ tsk salt
4 tsk þurrger
80 gr sykur
4 dl volgt vatn
1 dl jurtaolía
Fylling
3 msk sykur
3 msk púðursykur
1 msk kanill
Blandið þessu öllu saman í skál.
Aðferð
Setjið öll þurrefnin í hrærivélaskál og blandið aðeins saman með króknum.
Bætið vökvanum saman við og hnoðið í hrærivélinni, fyrst mjög varlega en aukið svo aðeins hraðann. Hér er lykilatriði að hnoða deigið lengi, fimm mínútur er gott – fylgist með tímanum.
Látið síðan hefast á volgum stað í ca 30 mínútur og setjið rakt stykki yfir.
Takið þá deigið úr skálinni og setjið á hveitistráða borðplötu.
Fletjið það út í nokkuð góðan ferhyrning og stráið sykur/kanilblöndunni jafnt yfir deigið (athugið að ekkert smjör fer undir sykurinn).
Rúllið síðan deiginu upp í lengju og lokið kantinum með því að pensla hann með vatni.
Skerið lengjuna í hæfilega snúða og raðið á plötu.
Hitið ofninn í 50°c.
Úðið snúðana með volgu vatni og setjið í ofninn. Látið hefast í ofninum í 45mín. Úðið snúðana einu sinni eða tvisvar á þessum tíma.
Takið snúðana út og hitið ofninn að 220°c.
Bakið síðan snúðana í ca 10-12 mín – fer eftir ofninum. Fylgist bara vel með.
Að lokum er settur glassúr ofan á snúðana, eftir að þeir hafa náð að kólna. Þá er gott að blanda saman flórsykri, kakó og mjólk, og betra að hafa glassúrinn í þykkari kantinum
