Í gegnum tíðina hafa verið uppi ýmsar hugmyndir og kenningar um brjóst kvenna.
Af hverju þau eru svona eða hinsegin, af hverju þau síga, hvað er gott að gera fyrir þau og þar fram eftir götunum. Oft snýst þetta um að halda lögun þeirra með hærri aldri.
Að sofa í brjóstahaldara?
Þekkt amerísk leikkona, sem komin er yfir fimmtugt, hefur t.d. gefið lesendum glanstímarits ráð varðandi brjóstin. En sjálf þykir hún hafa afar löguleg og falleg brjóst.
Leikkonan þekkta ráðlagði konum sem ekki vilja hafa lafandi brjóst niður að hnjám um þrítugt að vera alltaf í brjóstahaldara – líka á nóttunni. En hún þakkar einmitt brjóstahöldurum fyrir löguleg brjóst sín.
En skyldi leikkonan hafa rétt fyrir sér?
Ekki telja læknar það því samkvæmt öllum rannsóknum er það víst ein af staðreyndum lífsins að brjóstin síga með aldrinum og brjóstahaldarar bjarga því ekki. Kollagen og allur teygjanleiki húðarinnar minnkar með hærri aldri. Auk þess hefur breytingaskeið og hormónabreytingarnar sem því fylgja þau áhrif að þéttleiki brjóstanna minnkar en fituhlutfall hækkar.
Þess vegna gerir brjóstahaldarinn ekkert annað en að halda brjóstunum uppi og hann á engan þátt í því að móta eða laga brjóstin. Sú kenning hefur meira að segja komið fram hjá frönskum vísindamönnum að brjósthaldarar virki frekar í hina áttina og valdi því að brjóstin sígi enn meira.
Hvað með brjóstagjöf – veldur hún því að brjóstin síga?
Þessu hafa margir haldið fram í gegnum tíðina en samkvæmt nýlegum rannsóknum þykir ekkert benda til þess að brjóstagjöf geti haft þau áhrif á brjóstin. En annað mál er hins vegar með þungunina sjálfa. Konur sem þyngjast mikið á meðgöngunni og léttast síðan geta vænst þess að teygjanleikinn gefi eftir og það síðan valdið því að brjóstin síga seinna meir.
Geta sólböð og reykingar valdið því að brjóstin sígi?
Já, það er víst.
Sannað þykir að reykingar hafi áhrif á það. Og sama má segja um aðra óholla lífshætti sem eiga þátt í því að brjóta niður kollagen í húðinni. Að sleikja sólina hefur einnig neikvæð áhrif en geislar hennar brjóta niður kollagen í húðinni.
Geta réttu æfingarnar lyft brjóstunum og breytt lögun þeirra?
Nei, svo einfalt er það ekki. Þar sem brjóstin eru ekki mótuð úr vöðvum breyta 1000 armbeygjur á dag ekki brjóstunum sjálfum.
Hins vegar geta allar æfingar fyrir brjóstkassann og svæðið í kringum brjóstin hjálpað til við að styrkja það svæði sem síðan leiðir til þess að brjóstin virka fallegri og ekki eins sigin.
Og þar höfum við það!
