Gulrótarkaka er ein uppáhalds kakan mín og líklega sú kaka sem ég panta mér oftast á veitingastöðum og kaffihúsum. En ég hef hins vegar ekki verið dugleg að gera hana sjálf heima.
En þessi uppskrift hér breytir því – því hér þarf ekkert að skreyta eða smyrja kökuna alla að utan. Bara að strá smá flórsykri yfir og málið er dautt. Auk þess inniheldur uppskriftin ekki mikla olíu miðað við venjulega gulrótarköku, sem er mikill kostur.
Svo er þetta auðvitað nýtt tvist á gulrótarkökuna að bjóða upp á hana í svona rúllutertuformi.
Það sem þarf
Kakan
3 egg
135 gr sykur (2/3 bolla)
½ tsk salt
1 tsk vanilludropar
2 msk olía (canola)
1 tsk sítrónusafi
2 bollar niðurrifnar gulrætur (ca 2 miðlungsstórar)
100 gr hveiti (3/4 bolli)
½ tsk lyftiduft
½ tsk matarsódi
2 tsk kanill
1 tsk engifer
¼ tsk múskat
Fyllingin
240 ml (1 bolli) rjómi
250 gr Mascarpone ostur, við stofuhita
½ tsk kanill
60 gr (½ bolli) flórsykur
1 tsk vanilludropar
Yfir kökuna
30 gr (¼ bolli) flórsykur
Aðferð
Hitið ofninn að 180 gráðum.
Smyrjið form, 30 x 40 cm, með smjöri og þekjið síðan með smörpappír.
Rífið gulræturnar niður og setjið til hliðar.
Setjið egg, sykur, salt og vanilludropa í skál og hrærið saman þar til blandan er orðin ljósgul og freyðandi.
Bætið þá olíunni saman við og hrærið vel saman.
Setjið gulrætur og sítrónusafa út í skálina og blandið vel saman með sleif.
Takið sigti og setjið yfir skálina og sigtið hveiti, lyftiduft, matarsóda, kanil, engifer og múskat út í skálina. Hrærið síðan varlega saman.
Ef að gulrótarblandan er of blaut má bæta frá ¼ bolla til hálfs bolla (60 gr) af hveiti saman við.
Dreifið þá úr deiginu í formið og gætið þess að fara vel í hornin.
Setjið inn í ofn og bakið í 15 mínútur.
Takið hreint viskustykki og leggið á borðið og sigtið síðan flórsykur yfir það.
Takið kökuna út úr ofninum og úr forminu og leggið ofan á viskustykkið – flórsykurinn kemur í veg fyrir að hún festist við það. Losið smjörpappírinn af.
Sigtið þá flórsykur yfir kökuna.
Rúllið kökunni upp í viskustykkinu á meðan hún er enn heit, það er mjög mikilvægt því annars verður hún of hörð til þess. Látið hana svo kólna alveg.
Hrærið rjómann þar til hann er orðinn stífur.
Og hrærið Mascarpone ostinn, flórsykur, kanil og vanillu vel saman í annarri skál.
Bætið síðan ostablöndunni varlega saman við rjómann og notið sleif til að hræra þetta saman.
Takið þá kökuna og rúllið henni niður.
Smyrjið rjóma- og ostablöndunni á kökuna og rúllið henni svo aftur upp.
Setjið hana inn í ísskáp í nokkra tíma.
Stráið að lokum flórsykri yfir kökuna áður en hún er borin fram.
Njótið!
Sjáið hér í myndbandinu hvernig þetta er gert