Það er eitt og annað í þessu lífi sem lætur okkur eldast hraðar en nauðsynlegt er og þótt maður telji sig lifa nokkuð heilbrigðu lífi er samt ýmislegt sem maður áttar sig ekki á að lætur mann eldast hraðar.
Það eru nefnilega ekki bara reykingar sem fara illa með húðina heldur svo margt annað.
Hér er listi yfir níu atriði sem láta okkur eldast hraðar
1. Að sofa ekki nóg
Það vita flestir að það að fá ekki nægan svefn er hættulegt heilsunni og getur jafnvel stuðlað að sjúkdómum seinna á lífsleiðinni. En ekki vita allir að of lítill svefn getur haft alvarleg áhrif á húðina og látið þig líta út fyrir að vera mun eldri en þú ert.
Rannsóknir sýna fram á að húð þeirra sem sofa ekki nóg og/eða ekki nógu vel eldist hraðar, hrukkur aukast, teygjanleiki minnkar og litarhaftið verður ójafnt. Fyrir þá sem eru gjarnir á að fá bólur skiptir svefninn enn meira máli.
Mikilvægt er að fá 7 til 8 tíma svefn á hverri nóttu til að tryggja unglegri húð.
2. Að neyta of mikils sykurs
Sykur er ekki aðeins slæmur fyrir mittismálið og heilsuna heldur einnig fyrir húðina. Of mikil sykurneysla getur svipt húðina ljóma.
Samkvæmt rannsóknum líta þeir einstaklingar út fyrir að vera eldri sem eru með hátt magn blóðsykurs í líkamanum. Þá rænir of mikil sykurneysla þig orku og þegar þér líður alltaf eins og þú sért þreytt/ur þá líturðu út fyrir að vera eldri en þú ert.
3. Að vera sífellt stressaður
Ef þú ert stöðugt að stressa þig á öllu mögulegu og ómögulegu þarftu að fara að slaka á. Krónískt stress rænir þig góðum svefni og lætur þig þar af leiðandi eldast hraðar. Talið er þeir sem eru allt of stressaðir líti út fyrir að vera tíu árum eldri en þeir eru.
Hættu að stressa þig á þvottinum, matnum, unglingunum og öllu hinu – því þú breytir engu með stressi. Og ef það er starfið sem stressar þig upp þarftu kannski að tileinka þér einhverja tækni til að höndla það betur, t.d. með hugleiðslu eða öðru slíku.
4. Stöðugir megrunarkúrar
Ef þú ert sífellt að prófa nýja undrakúra sem eiga að losa þig við kílóin á stuttum tíma þá ættirðu að endurskoða það.
Margir megrunarkúrar útiloka alla fitu úr fæðunni, en fitan er húðinni mikilvæg. Þá eru aðrir kúrar þar sem ákveðnar fæðutegundir eru teknar út og við það getur húðin orðið af mikilvægum efnum eins og t.d. andoxunarefnum.
5. Of mikill andlits- og handþvottur
Auðvitað er mikilvægt að þrífa andlit og hendur vel en of mikið af því góða getur gert skaða. Húðin þornar við of mikinn þvott sem leiðir til þess að hún eldist fyrr.
Gæta þarf þess að nota ekki of sterk efni á húðina og venja sig á að nota nærandi krem á eftir.
Þetta á líka við um hendurnar. En það vill einmitt gjarnan gleymast að húðin á höndunum kemur oft upp um aldurinn – og ef ekki er hugsað nógu vel um húðina á höndunum þá gætir þú litið út fyrir að vera eldri en þú ert.
6. Að sitja of mikið
Stór hluti fólks situr of mikið. Það er setið við skrifborðið í vinnunni, setið í bílnum og fyrir framan sjónvarpið á kvöldin. En öll þessi kyrrseta gerir húðinni skaða, og öll vitum við hvað kyrrsetan gerir heilsunni.
Nýleg rannsókn sýnir fram á að konur á aldrinum 64 til 95 sem sitja í meira en 10 tíma á dag líta út fyrir að vera átta árum eldri en konur sem eru virkari.
Það er því afar mikilvægt að hreyfa sig – og 30 mínútur á dag gera heilan helling fyrir þig.
7. Lítið eða ekkert kynlíf
Hér er komin enn ein góð ástæða fyrir því að stunda kynlíf – en talið er það að stunda kynlíf reglulega láti fólk líta út fyrir að vera fimm til sjö árum yngri.
Með kynlífi losnar um gleðihormónið endorfin í líkamanum en það leiðir til betri svefns og losar um stress. Þá telst kynlíf líka til hreyfingar, sem gerir húðinni gott.
8. Að nota ekki sólarvörn
Sólarvörn á ekki aðeins að nota til varnar bruna heldur til að halda húðinni vel nærðri í sólinni. Því eins og flestir vita þá þurrkar sólin húðina – og þurr húð eldist fyrr.
En það er ekki nóg að nota sólarvörnina eingöngu þegar farið er á ströndina. Rannsóknir sýna fram á að þeir sem nota sólarvörn við daglega iðju að minnsta kosti þrisvar til fjórum sinnum í viku eru ólíklegri til að sjá merki öldrunar fyrr en eðlilegt er á húð sinni.
Í dag má fá rakakrem, lituð dagkrem og meik með sólarvörn í.
9. Að æfa of mikið
Þótt hreyfingin sé góð bæði fyrir líkama og sál (og auðvitað húðina) þá má öllu ofgera.
Of miklar og strangar æfingar geta tekið sinn toll og látið þig eldast hraðar en nauðsynlegt er. Gefðu líkamanum tækifæri til að endurnæra sig á milli æfinga og umfram allt; hlustaðu á líkamann og taktu frídaga þegar hann þarf á því að halda.
Heimildir – cheatsheet