Hefurðu prófað agúrkuvatn?
Ef ekki ættir þú kannski að skoða það að bæta því við það sem þú drekkur yfir daginn.
Gúrkuvatnið er afar gott fyrir líkamann og hjálpar til við að næra hann. Auk þess getur það bætt útlitið og látið þér líða betur.
Eins og allir vita er vatn mjög gott fyrir líkamann en agúrkuvatn er þó enn betra því með agúrkunum fáum við um leið bæði vítamín og steinefni. Gúrkurnar bæta þessu auka við sem við þurfum til að halda líkamanum vel nærðum.
Hér eru nokkur atriði sem agúrkuvatn hefur áhrif á
1. Blóðþrýstingur
Agúrkuvatnið getur haft jákvæð áhrif á of háan blóðþrýsting en því má meðal annars þakka kalíum sem finna má í gúrkum.
2. Matarlyst
Það getur haft hemil á matarlystinni. Að drekka glas af gúrkuvatni getur hjálpað til á milli mála þegar hungrið er að gera út af við þig.
3. Þyngdartap
Sumir vilja líka halda því fram að agúrkuvatn með t.d. sítrónu og myntu geti leitt til þyngdartaps. Við seljum það ekki dýrara en við keyptum það!
4. Fyrir húðina
Gúrkuvatnið róar húðina og veitir aukinn raka. Auk þess innihalda gúrkur kísil sem bæta enn frekar við kosti þess fyrir húðina.
5. Fyrir líkamann
Í agúrkum eru andoxunarefni og vatn með gúrku getur hjálpað til við að afeitra líkamann. Með því að drekka gúrkuvatn árið um kring geturðu stuðlað að meiri vellíðan.
6. Fyrir vöðvana
Kísillinn í gúrkunum hefur líka jákvæð áhrif á vöðva líkamans. Eitt glas af gúrkuvatni á dag hefur góð áhrif á vöðvavefi líkamans og líkamann í heild sinni.
Og með jarðarberjum, sítrónu og fleira má gera gúrkuvatnið enn betra
Einfalt er að gera agúrkuvatn; bara setja vatn í könnu eða glas og skera niður agúrku og setja út í vatnið.
Til að auka áhrifin enn frekar má líka setja sítrónur og jarðarber út í en þessi þrjú vinna vel saman þar sem þau innihalda ólík næringarefni. Þetta er t.d. alveg tilvalinn drykkur fyrir sumarið, frískandi og góður.
Þá er líka gott að blanda saman agúrku, sítrónu og ferskri myntu. Afar frískandi drykkur sem einnig gefur líkamanum ólík næringarefni og vítamín.
Prófaðu líka agúrkuvatn með bláberjum og jarðarberjum – þetta vatn er stútfullt af andoxunarefnum. Svo er líka hægt að bæta basiliku við gúrkuvatnið en það gefur gott bragð um leið og þú færð andoxunarefni og vítamín.
Agúrkuvatn í öllum þessum spennandi útgáfum er svo auðvitað mjög fallegt að bera fram í glærri glerkönnu þar sem innihaldsefnin sjást greinilega.
