Góður pastaréttur klikkar ekki – og þessi hér er afar einfaldur en alveg rosalega góður.
Hvítlaukur er eitt uppáhalds kryddið mitt og það er sko nóg af honum í þessari uppskrift.
Vakti mikla lukku
Ég gerði þennan rétt í fyrsta skipti nú um daginn og hann vakti mikla lukku hjá fjölskyldunni. Svo hann er klárlega kominn á lista yfir þá rétti sem verða gerðir aftur og aftur…
Í uppskriftinni er gert ráð fyrir hvítvíni en ég sleppti því í þetta sinn og notaði meiri sítrónusafa í staðinn. Þá átti ég ekki chiliflögur en notaði Chili Explosion kryddið frá Santa Maria þess í stað – það kom mjög vel út og ég smakkaði réttinn áfram og bætti chili við eins og mér fannst þörf á.
Ef þig langar í einfaldan og góðan pastarétt þá er þessi algjörlega málið!
Það sem þarf
500 gr Penne pasta
1 msk ólífuolía
15 hvítlauksrif
3 tómatar
1 bolli hvítvín
1 tsk chiliflögur
2 msk rjómi
3 msk Parmesan ostur
20 basilíkulauf
½ til 1 sítróna (kreist)
2 msk smjör
Aðferð
Sjóðið pastað samkvæmt leiðbeiningum á pakka.
Skerið tómatana í litla bita, maukið hvítlaukinn og skerið basilíkuna.
Setjið ólífuolíu á stóra pönnu og hitið að miðlungshita.
Látið hvítlaukinn á pönnuna og leyfið honum að malla í 5 mínútur. Hrærið í honum annars slagið.
Bætið þá tómötum, salti og chili saman við og látið þetta malla í 5 mínútur.
Blandið hvítvíni, safa úr sítrónu og rjóma saman við og látið malla í 10 mínútur. Ég sleppti því að nota hvítvín, og setti aðeins meiri sítrónusafa í staðinn.
Takið pastað og hellið vatninu af því og setjið það út á pönnuna.
Setjið rifinn parmesan ost yfir og blandið honum saman við pastað og sósuna.
Bætið þá basilíkunni út í og blandið henni saman við.
Að lokum er smjörinu sett út í og látið bráðna saman við sósuna.
Smakkið til og bætið salti og/eða chili við ef þess þarf.
Stráið síðan rifnum osti yfir þegar pastað er komið á diska.
Njótið!
Uppskriftina fékk ég hjá Tastemade.
Jóna Péturs – kokteillinn@gmail.com