Ekki svo slæmt að skipta á ostrum og þorláksmessuskötunni

Forsíða » Nýtt » Ekki svo slæmt að skipta á ostrum og þorláksmessuskötunni

Gunnar Guðbjörnsson, óperusöngvari með meiru, bjó og starfaði erlendis lengi vel. Hann er því vanur að halda jól í útlöndum og hefur kynnst ýmsu í þeim efnum. En jólin í ár verða þó íslensk eins og undanfarin ár.

Við fengum tenórinn í stutt jólaspjall og síðan laumaði hann að okkur uppskrift að uppáhalds smákökunum.

Við hófum spjallið á því að forvitnast um hans bestu jólaminningu?

Ætli það séu ekki rólegu jólin sem við áttum úti í Berlín þegar jólin einkenndust af algjörum rólegheitum og afslöppun. Synirnir voru litlir og glöddust yfir gjöfunum. Ég man sérstaklega eftir einum jólum þar sem ég hafði verið burtu dagana fyrir jól eins og svo oft áður að syngja á einhverjum jólatónleikum og kom heim á Þorláksmessu. Ólöf konan mín var búin að undirbúa það mesta og aðeins eftir að gera ein stór matarinnkaup og mikil eftirvænting í húsinu.

Það sem þó skorti oftast í Berlín var alvöru jólasnjór en einmitt um það bil kl. 16:00 á aðfangadag þegar allt var komið í hús og ég var byrjaður að huga að matargerð byrjaði að snjóa kröftulega. Það var s.s. allt hvítt á jólanótt og jóladag nýttu drengirnir okkar í að leika sér í snjónum. En annars eru öll jól bestu jól sem maður hefur upplifað og það er t.d. ávallt samdóma álit allra heimilismeðlima að það jólatré sem stendur í stofunni hverju sinni sé það allra fallegasta sem hafi komið inn á heimilið.

Hver var jólamaturinn á þínu heimili þegar þú varst að alast upp?

Við hjónin erum bæði alin upp við Hamborgarhrygg og höfum haldið fast í þá hefð. Það var aldrei neitt vandamál að fá einn slíkan í Þýskalandi enda er reyktur svínahryggur, Kasseler eins og það heitir á þeirra máli, mjög algengur matur yfir vetrarmánuðina. Það var hinsvegar ekki eins auðvelt að fá alveg rétta hrygginn þegar við eitt sinn héldum jól í Brussel og við enduðum á því að finna þýskann slátrara sem var með alveg það rétta fyrir okkur.

Og er einhver jólahefð sem þú ólst upp við sem þú hefur haldið?

Já, þær eru ýmsar en hafa kannski flestar með matargerðina að gera. Einu kynntist ég frá manni móður minnar sem bjó lengi í Noregi en það er að bjóða upp á Julefrokost á jóladag. Við höfum kannski ekki alveg sama háttinn á og hann hafði enda bauð hann jafnan uppá snaps og bjór með kræsingunum þó á honum sjálfum sæi aldrei vín en það er víst hluti af hefðinni á Norðurlöndum. Hann átti ættingja í Danmörku og var vanur að hafa Álaborgar ákavíti en annars er boðið upp á alskonar kæfur, skinkur, grafinn og reyktan lax, ansjósur, síld og allra handanna góðgæti.

Hvað verður á borðum hjá ykkur á aðfangadag?

Eins og áður sagði er það Hamborgarhryggurinn en við höfum á síðustu árum einfaldað nokkuð meðlætið. Ég bý alltaf til mitt eigið rauðkál og nota þar ýmislegt til að bragðbæta eins og sólberjasaft, sinnep, chili og hunang svo eitthvað sé nefnt.

Ég brúna kartöflur eins og mamma var vön að gera og svo höfum við stundum eitthvað sem ekki er alveg hefð fyrir eins og gulrætur sem ég steiki í smjöri með hvítlauk og chili.

En hver eldar jólamatinn í ár?

Konan mín er reyndar orðin fyrirtakskokkur enda naut mín ekki alltaf við til eldamennsku en ég hef haft gaman af því að elda síðan ég var í menntaskóla. Einhvern tímann þegar ég var nýlagður af stað í söngferð sagði elsti sonur okkar við Ólöfu mína að fyrst pabbi væri nú farinn gæti hann aftur farið að búa sig undir að fá oftar grjónagraut og lét hún þá ekki á sér standa og hristi af sér sliðruorðið.

Ég hef hinsvegar oftar en ekki tekið að mér að elda „fínan“ mat og þá sérstaklega á stórhátíðum og jólin eru ekki nein undantekning þar. Hún er hinsvegar mun færari á öllum sviðum baksturs og eftirréttagerðar og hún sér um að gera eftirréttinn á jólum.

Hvaða matur er í þínum huga ómissandi á jólum?

Við erum með gamaldags „frómas“ með Kahlua líkjör í sem hefur fylgt okkur gegnum árin og ég held við tækjum varla upp á að sleppa honum. Svo eru það smákökur sem ég get eiginlega ekki hugsað mér að vera án en það eru svona hefðbundnar súkkulaðidropakökur með uppskrift frá tengdamömmu. Ég held það sé eina kakan sem ég hef gert um dagana og ég gerði m.a.s. einu sinni deig núna fyrir jólin en við bökum þetta yfirleitt nokkrum sinnum enda hverfa þær fljótt þegar það eru þrír svangir synir sem stelast í dósirnar. En ég má til með að gefa ykkur uppskriftina að þessum kökum.

Hvenær skreytið þið jólatréð, eða er kannski búið að því?

Við höfum eiginlega alltaf skreytt þann 22. desember og verið búin að flestu slíku fyrir Þorláksmessu. Við erum ansi upptekin af trénu og förum helst öll saman til að velja það og getum lent í talsverðum hremmingum við innkaupin. Í fyrra fórum við tómhent heim og þurftum að fara aðra ferð því ekkert þeirra sem við sáum var nógu gott og einhvern tímann í Berlín voru öll trén svo ómöguleg að við urðum að taka eitt sem var vel á þriðja metra hátt. Árið eftir þegar við komum að kaupa var jólatrésalinn uppveðraður því þá kom í ljós að við höfðum keypt stærsta tréð árið áður og nú vildi hann ekki bregðast okkur. Hann virtist vita hve mikil lofthæð væri heima hjá okkur enda jólatrésalan á móti húsinu okkar og það sem við fengum þetta árið náði alveg upp í loft – lofthæðin var 3,40 metrar.

Ertu einn af þeim sem geymir að kaupa eina gjöf þar til á Þorláksmessu?

Ég er lítið fyrir stressið og reyni eins og ég get að vera búinn að sem mestu á Þorláksmessu. Það er helst að eitthvað vanti til matargerðarinnar og yfirleitt redda ég ýmsu þann dag. T.d. í Lyon var oft ekki hægt að redda sér skötu og þá varð maður að hafa eitthvað í staðinn. Það var einhvern veginn engin stemning fyrir því að fá sér saltfisk í stað skötunnar og því varð það hefð þessi fjögur ár þar að kaupa ostrur og þær voru auðvitað alltaf keyptar inn þann daginn. Verð að játa að eins mikill skötuaðdáandi og ég er þá voru ostrurnar ekki slæm skipti.

En hvað langar svo söngvarann mest í í jólagjöf?

Ég hef eiginlega ekki hugsað um það en ég varð fimmtugur í sumar og fékk ansi mikið af þessum veraldlegu óskum uppfylltar. Nú hef ég eiginlega mestan áhuga á að fá eitthvað til að veiða í gjafir eða þá ef einhver vill virkilega gleðja mig þá er ég mjög móttækilegur fyrir flugmiða til útlanda…

Hvaða væntingar hefurðu fyrir árið 2016?

Ég lít björtum augum til næsta árs en síðustu fimm árin hafa krafist mikils af mér. Ég hef dregið saman seglin í söngnum og syng eiginlega mjög sjaldan nú orðið. Ég kláraði mastersnám fyrir þremur árum síðan og nú sinni ég þremur störfum samtímis og óhætt að segja að ég láti mér ekki leiðast í vinnunni.

Vissulega er oft í mörg horn að líta en ég er nú einu sinni þannig að þegar ég hef brjálað að gera líður mér best. Það er ekki útlit fyrir að verkefnum fækki alveg á næstunni, svo mikið er víst en rúmt síðastliðið ár hefur að stórum hluta farið í baráttu fyrir tónlistarnámi á Íslandi og er ég nokkuð bjartsýnn á að því máli verði komið í góðan farveg fyrir vorið. Það eru mikil tækifæri í tónlistarkennslunni og ég vona og vænti þess að ég fái að taka afgerandi þátt í því á árinu 2016 að móta þann hluta sem lýtur að söngmenntun svo við á Íslandi höldum áfram að vera í fremstu röð á því sviði.