Konur á vissum aldri þurfa að kljást við eitt og annað sem tengist breytingum á líkamsstarfsemi þeirra.
Eitt af því eru hitakóf sem gera mörgum konum lífið leitt. Þessi kóf geta skollið á hvenær dagsins sem er – en ekki nóg með það því þetta getur líka gerst í fastasvefni um miðja nótt.
Næturútgáfan af hitakófi
Þegar hitakóf skellur á um miðja nótt er það kallað nætursviti. Nætursviti er næturútgáfan af hitakófi og getur verið virkilega bagalegur og komið í veg fyrir að konur fái næga hvíld.
Hver getur líka sofið rennsveittur og þvalur?
Sumar konur svitna það mikið að þær þurfa að skipta um náttföt og jafnvel rúmföt. Augljóslega veldur slíkt miklum truflunum á svefni. Hörundshiti getur hækkað um tvær til þrjár gráður meðan á hitakófi eða nætursvita stendur.
Konur sem stöðugt eiga við nætursvita að stríða geta orðið örmagna vegna svefnleysis. Þrátt fyrir það eru þessar konur ekki mikið að kvarta og kveina – hvað þá að útskýra fyrir öðrum að þær séu uppgefnar vegna þess að nætursviti haldi fyrir þeim vöku. Fæstar konur eru eitthvað að tilkynna það sérstaklega að þær séu á breytingaskeiði. Þær halda bara áfram að sinna sínu
Hrjáir 75 prósent kvenna
Nætursviti er einn algengasti fylgifiskur breytingaskeiðsins og er talinn hrjá allt að 75 prósent kvenna á aldrinum rétt fyrir fimmtugt til rúmlega fimmtugs. Hann fylgir tímabilinu fyrir tíðahvörfin sjálf og finna flestar konur eingöngu fyrir honum á því skeiði. Eftir það virðist sem líkaminn nái að aðlagast breyttu hormónamagni og um leið dregur úr nætursvita.
Engu að síður er talið að um tíu prósent kvenna fái enn nætursvita eftir tíðahvörf. Ef þú hefur á tilfinningunni að nætursvitinn stafi ekki af breytingaskeiði skaltu leita strax til sérfræðings því fjölmargar aðrar orsakir geta legið að baki. Nætursviti getur meðal annars verið vísbending um alvarlega sjúkdóma.
