Það er óhjákvæmilegt og ekki nokkur leið að neita því að með aldrinum breytist bæði líkami okkar sem og húðin.
Ekki er þar með sagt að allir séu alveg sáttir við þessar breytingar og margir reyna allt hvað þeir geta til að halda í það sem áður var.
En með hærri aldri getur verið gott, og jafnvel nauðsynlegt, að hugsa hlutina upp á nýtt og gera breytingar sem henta á hverjum tíma. Eða að minnsta kosti að gera ekki þau mistök að festast í því sama og gera ekki neitt.
Hér eru 10 algeng mistök sem konur gera – og hvernig má forðast þau
1. Ekki einblína á það hvernig þú leist út rúmlega tvítug
Vertu sanngjörn við sjálfa þig og þakklát fyrir að fá að eldast. Það lítur enginn eins út 45 ára gamall og þegar hann var 25 ára. Svo ekki bera þig í dag saman við þá sem þú varst fyrir 20 árum síðan.
Markmiðið er að gera það besta úr því sem maður hefur hverju sinni og að hugsa fyrst og fremst um heilbrigðið. Það eitt og sér að huga að því að halda heilsu er gott markmið.
2. Ekki gera ekki neitt
Ein stærstu mistök sem konur gera er að gera ekki neitt. Það sem hentaði þér í hári, förðun og klæðnaði hér áður fyrr passar kannski ekki alveg fyrir þig núna. Það er ekki þar með sagt að það þurfi að gera meiriháttar breytingar heldur aðeins að endurskoða hlutina.
Getur t.d. verið að hárliturinn sé ekki réttur fyrir litaraftið?
Eða að förðunin henti ekki húð sem er að eldast… og þar fram eftir götunum.
3. Það eru engar hárreglur
Ekki halda að þegar þú verður fimmtug að þú þurfir að klippa hárið stutt eða upp fyrir axlir. Það eru engar reglur!
Allt fer þetta eftir hverri og einni konu og auðvitað ástandi hársins. Svo ef þú vilt hafa sítt hár þá hefur þú sítt hár – svo framarlega sem það klæðir þig. En þá er líka um að gera að finna rétta stílinn sem hentar þér núna. Og ekki láta segja þér að þú þurfir að klippa þig stutt.
4. Að nota ekki rétta meikið
Litaraft okkar breytist með hærri aldri og húðin verður þynnri. Þess vegna er mjög líklegt að það meik og þeir litir sem þú hefur kannski notað lengi sé ekki alveg það rétta fyrir þig núna.
Ekki er heldur skynsamlegt að nota of mikið af þessum vörum í þeim tilgangi að ætla að fela hrukkur og línur því of mikil notkun lætur þig aðeins líta út fyrir að vera eldri. Reyndu frekar að ná fram náttúrulegu útliti með þynnri förðun.
5. Að gleyma tönnunum
Ekki hugsa bara um að þú sért að fá hrukkur og að hárið sé að þynnast. Hugsaðu vel um tennurnar og ekki sleppa tannlæknaheimsóknum.
Illa hirtar og gular tennur láta okkur líta út fyrir að vera eldri. Auk þess hefur slæm tann- og gómheilsa verið tengd við alvarlega líkamlega sjúkdóma, t.d. hjartavandamál.
6. Að fá ekki nægan svefn
Þeir dagar eru liðnir að þú getir vakað fram eftir og vaknað eins og nýútsprungin rós.
Ef þú færð ekki nægan svefn er það fljótt að sjást á þér núna. Svo ekki svindla á svefninum. Auk þess er svefninn mikilvægur fyrir gott heilsufar og það er algjör óþarfi að taka áhættu með heilsuna þegar við eldumst.
7. Að sleppa því að hreyfa sig
Það getur verið freistandi að hætta eða minnka hreyfinguna þegar þú eldist. En alls ekki gera það.
Þótt þú finnir til í líkamanum þá borgar sig ekki að sleppa hreyfingunni – enda mun hreyfingin að öllu líkindum bæta líðanina.
Hreyfingin skiptir miklu máli þegar við eldumst en þú þarft ekkert að fara hlaupa maraþon, veldu þér bara hreyfingu sem hentar þér og þú hefur gaman af. Þetta skilar sér bæði í betri heilsu sem og því að óvænt kíló setjist ekki á þig.
8. Að vanda sig við fataval
Óhjákvæmilega breytist líkami okkar með hærri aldri og því getur þurft að endurskoða klæðaburðinn. Að öllum líkindum geturðu ekki lengur hoppað í hvaða flík sem er og litið vel út.
Nú þarf að vanda sig meira. Svo farðu vel yfir fataskápinn og skoðaðu líka hvort aðhaldsfatnaður geti hjálpað.
9. Að vera í ranga brjóstahaldaranum
Þetta er mun algengara en þig grunar. Og sérstaklega þegar konur eldast.
Það er þetta með að líkaminn breytist, og þá breytast auðvitað brjóstin líka. En magar konur halda samt áfram að kaupa eins brjóstahaldara og í sömu stærðinni í mörg, mörg ár.
Rétti haldarinn getur gjörbreytt því hvernig efri hluti líkamans lítur út. Svo vandaðu valið og fáðu jafnvel aðstoð við að finna rétta brjóstahaldarann.
10. Að gleyma kynþokkanum
Það er ekkert samasemmerki á milli þess að vera ungur og að vera kynþokkafullur. Kynþokkinn hverfur ekkert með hærri aldri svo ekki halda að þú sért ekki lengur kynþokkafull.
Berðu höfuðið hátt og flaggaðu kynþokkanum.
